දැන් දැන්ම නොපමාව කටයුතු කරන්න

යෝ ච පුබ්බෙ පමජ්ජිත්වා

පච්ඡ සො නප්පමච්චති 

සො ඉමං ලෝකං පභාසෙති

අබ්භා මුත්තොච චන්දිමා 

යමෙක් මුලදී පමා වුවත් 

පසුව නොපමා වේ නම්, 

ඔහු වලාකුලින් නිකුත් වූ 

සඳක් මෙන් මේ ලෝකය බබුලුවයි. 

තමා විසින් තමා දිනීම අන් කවර දෙයටත් වඩා උසස්ය

අත්තා භවේ ජිතං සෙය්යෝ

යා චායං ඉතරා පජා 

අත්ත දන්තස්ස පොසස්ස 

නිච්චං සඤ්ඤතචාරිනෝ 

දූ කෙලි ආදියෙන් අනුන් දිනීමට වඩා 

තමා විසින් තමා දිනා ගැනීම ඒකාන්තයෙන්ම ඉතා උසස්ය. 

නිතර තැන්පත් හැසිරීම් ඇති ආත්මය දමනය කරගත් පුරුෂයාගේ 

ඒ දිනීම පැරදවීමට කිසිවෙකුට නොහැක. 

( සහස්‍ර වර්ගය )

තමා උපමා කල විට වරදින් වැළකිය හැකිය

සබ්බේ තසන්ති දණ්ඩස්ස 

සබ්බේ භායන්ති මච්චුනෝ

අත්තානං උපමන් කත්වා

න හනෙය්ය න ඝාතයෙ

සියල්ලෝම දඬුවමෙන් තැති ගනිති

සියල්ලෝම මරණයට බිය වෙති

එහෙයින් තමා උපමා කොට සිතා 

අනුන් නොනැසිය යුතුය. නොනැසවිය යුතුය. 

( දණ්ඩ වර්ගය )

තමාට වැඩදායක දෙයක් කිරීම පහසු නොවේය

සුකරානි අසාධුනි

අත්තනෝ අභිතානිච

යාංචේ හිතන් ච සාදුඞ්  ච

තන් වේ පරමදුක්කරඞ්

තමාට අහිත වූ අයහපත් දේ 

ලෙහෙසියෙන් කරගත හැකිය. 

යම් දෙයක් තමාට වැඩදායක හෝ 

යහපත් හෝ වේ නම් එය කිරීම ඉතා අමාරුය

( ආත්ම වර්ගය )

මනා කොට පිහිටුවන ලද සිත අන් සියලු දෙයට වඩා උතුම්ය

න තඞ් මාතා පිතා කයිරා 

අඤ්ඤ වා' පිච ඥාතකා 

සම්මාපනිහිතඞ් චිත්තඞ්

සේය්යසෝ නං  තතෝ කරෙ

මනා කොට පිහිටුවන ලද සිත 

මව් පිය නෑදෑයන් විසින් පවා 

නොකළ හැකි යහපතක් කරන්නේය

පුද්ගලයා උතුමෙකු කරන්නේය 

( චිත්ත වර්ගය ) 

සැමවිට අර්ථවත් වචන භාවිතා කරන්න

සහස්සම්පි චේ වාචා

අනත්ථ පද සංහිතා 

එකඞ් අත්තපදඞ් සෙය්යෝ

යං සුත්වා උපසම්මති 

අනර්ථ සිදු කරන පදවලින් යුත් වචන දාහක් වුවත් උසස් නැත. 

යම් වචනයක් ඇසීමෙන් මිනිසා සංසිඳීමට පත්වේ නම් 

එබඳු අර්ථවත් එක පදය පවා ඉතා උතුම්ය. 

( සහශ්‍ර වර්ගය )

නුවනැත්තා චපල වූ සිත සැමවිට පාලනය කරගනී

ඵන්දනඞ් චපලඞ් චිත්තඞ්

දුරක්ඛඞ් දුන්නිවාරයඞ්

උජුං කරෝති මේධාවී 

උසුකාරෝව තේජනං 

චංචල වූ චපල වූ රැකීමට අපහසු, 

දුසිරිතෙන් වෙන් කොට ගැනීම අපහසු සිත, 

නුවනැත්තා,

වඩුවකු හී දණ්ඩක් ඍජු කරන්නාක් මෙන් ඍජු කරයි 

( චිත්ත වර්ගය )